Gjykata Themelore e Prishtinës ka vendosur të vazhdojë me dy muaj të tjerë masën e paraburgimit të pandehurve Dragisha Viqentijeviq dhe Jovan Viqentijeviq,

Ata janë arrestuar si të dyshuar për sulmin në kanalin e Ibër Lepencit, që ndodhi mbrëmjen e 29 nëntorit.

Zëdhënësja e Gjykatës Themelore të Prishtinës, Mirlinda Gashi, ka deklaruar për Arbresh.info se vendimi për vazhdimin e paraburgimit është marrë të premten.

“Ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurve J.V. dhe D.V., Gjykata Themelore në Prishtinë – Departamenti Special me datë 28.02.2025 ka marr Aktvendim dhe ka aprovuar kërkesën e PSRK-së, ashtu që masa e paraburgimit të pandehurve J.V. dhe D.V., iu vazhdohet në kohëzgjatje prej 2 (dy) muaj, për secilin”, tha Gashi.

Ndryshe, Prokuroria Speciale e Republikës së Kosovës kishte thënë se ekziston dyshimi i bazuar se Jovan Viqentijeviq, bashkë me vëllanë e tij, Dragisha Viqentijeviq me qëllim kanë dëmtuar pajisjen e ujësjellësit dhe kanë kryer veprën terroriste, duke përdorur eksploziv./Arbresh.info